• Collaboraciones en proyectos

    Llaboral Cinemateca, de magar se creó en mayu del 2016, patrocinó y collaboró al traviés del Film Commission del Principáu d´Asturies col rodaxe de delles producciones cinematográfiques, coles mires de promover y consolidar la rexón como escenariu pa rodaxes, promocionando tanto´l turismu y la cultura del Principáu como la industria audiovisual asturiana.

    Ye´l casu d´El secreto de Marrowbone, ópera prima del cineasta asturianu Sergio G. Sánchez; el primer llargumetraxe del asturianu Samu Fuentes, Bajo la piel de lobo; La Zona, la serie nueva esclusiva de Movistar+ creada polos hermanos Alberto y Jorge Sánchez-Cabezudo o The Maus, el primer llargu del director uviedín Yayo Herrero. Amás, Turismu Asturies y el Film Commission del Principáu collaboraron colos documentales Cantábrico. Los dominios del oso pardo, de Joaquín Gutiérrez Acha, y 100 díes de soledá, de José Díaz, pa los que se desenvolvieron delles acciones de sofitu a la difusión y promoción.