Llaboral Cineteca ye un espaciu polifacético y abiertu de Llaboral Ciudá de la Cultura dedicáu n´esclusiva al cine.

Llaboral Cineteca, per un llau, quier estimular el conocimientu del arte cinematográficu na so dimensión cultural, xeográfica y histórica y en toles sos facetes y xéneros, col averamientu y la difusión de les sos obres pente medies de programes de proyecciones fílmiques, seminarios, actividaes educatives y otres iniciatives especiales.

Per otru llau, y non menos importante, Llaboral Cineteca ye tamién un serviciu públicu pal sector creativu cinematográficu y audiovisual asturianu al traviés de la Film Commission, Cineteca distribuidora y Cineteca curtios.

Ente los oxetivos principales de Llaboral Cineteca atópense estos:

  • Programación de proyecciones, actividaes educatives, seminarios y conferencies col fin de formar nel arte cinematográficu y difundilu con criterios d´estratexa cultural al serviciu de tola sociedá asturiana.
  • Atracción de públicu nuevo a la cultura cinematográfica y audiovisual.
  • Collaboración con otres instituciones y alministraciones de la xeografía asturiana pa la organización conxunta de programación cinematográfica.
  • Sofitu a la creación de películes y curtiumetraxes realizaos n´Asturies, amás de la so difusión y promoción en mercaos y festivales.
  • Distribución de películes realizaes por creadores asturianos o residentes n´Asturies.
  • Promoción d´Asturies como escenariu pa rodaxes.
  • Busca de localizaciones, sofitu loxísticu y xestión de permisos pa filmaciones.
  • Enllaz con empreses profesionales del sector audiovisual.

Llaboral Cineteca ta promovida pola Conseyería d´Educación y Cultura al traviés de la Sociedá Pública de Xestión y Promoción Turística y Cultural del Principáu d´Asturies.